Itinuturing ang epikong-bayan na Palaisgen na pinakamahaba at pinakamataas na panitikan ng mga Tagbanua ng Aborlan, Palawan. Isinalaysay sa epikong-bayan ang paglalakbay ng bayaning si Palaisgen sa lupa at ang kaniyang mga kagila-gilalas na pakikipaglaban upang ipagtanggol ang mga tao laban sa mga masasamang halimaw. Bukod sa pagiging bayani ng epikong-bayan, itong si Palaisgen din ay itinuturing na diwata ng digma ng mga Tagbanua. Tanging babaylan lamang ang nakatatawag sa kaniya. Tagapagtanggol si Palaisgen ng mga Tagbanua at nagbibigay siya ng tulong sa mga ito sa panahon ng kagipitan. Dakilang layunin ni Palaisgen na panatilihin ang kapayapaan sa lupa.

Tampok sa aklat na ito ang saliksik ni Paul D. Jagmis Sr., PhD na siya ring nagsalin ng tekstong Tagbanua sa Filipino sa tulong ni Mary Grace A. Jagmis at isinalin naman sa Ingles ni Jonalyn B. Villarosa. Idinagoy o inawit ito ni Gem-Gem Bagued at Fernando Lingsa at tinultol o isinalaysay ni Delia Jardinero.